सोबती राहून ना व्यवहार केले
वेदनांनी केवढे उपकार केले

 

नभसख्याची लागता चाहुल, धरेने
केवढे रोमांचुनी श्रंगार केले !

 

पातिव्रत्त्याला जिथे पावित्र्य होते
लग्न ना करता सुरू संसार केले

 

बाटली घटना किती आंबेडकरजी !
लोकशाहीशी कुणी व्यभिचार केले?

 

राज्य, नेत्यांनो दिले ज्यांनी कराया
त्याच जनतेला तुम्ही लाचार केले

 

वाचले पण पाहिले नाहीच देवा
दानवांचे तू कधी संहार केले

 

द्यावया प्रतिमेस देवांच्या झळाळी
निर्मुनी खलनायकावर वार केले

 

भीक का देता उगा आरक्षणाची?
वाट खडतर, चालणे स्वीकार केले

 

भ्रष्ट का "निशिकांत" तू झालास इतका?
पालकांनी हेच का संस्कार केले?

 

 

 

निशिकांत देशपांडे.

 

 

Powered by Froala Editor