हाच माझा दोष, मी सोशीक होतो!
एवढे जाता वजा, मी ठीक होतो!!

 

सोसली नाही अपूर्वाईच माझी....
ते म्हणाले मी त-हेवाईक होतो!

 

केवढी किरकोळ अन् फाजील दृष्टी....
कातला गेलो किती बारीक होतो!

 

झेपली घनता न शेरांचीच माझ्या.....
वाटलो धेंडांस पाल्हाळीक होतो!

 

शारदे, भरलीस माझी तूच झोळी....
दिव्य शब्दांची तुझ्या मी भीक होतो!

 

मी न कुटले टाळ, नव्हती माळ कंठी....
मी विठूचा लाडका भावीक होतो!

 

 

-------प्रा.सतीश देवपूरकर

 

Powered by Froala Editor