• दूर....अगदी दूर...अंतर पाहुनी भ्यालो जरी;
  हे न थोडे की, सतत मी काटला रस्ता तरी!
  श्वास टाकायास थोडा थांबलो वाटेमधे.....
  तोच माझे गाव आले खुद्द, चालत सत्वरी!!

   

• माणसे जर पुस्तके झाली खरोखर!
  रोज आवृत्ती नवी आली खरोखर!
  केवढी होईल ही दुनिया सुरीली.....
  माणसांची जर गझल झाली खरोखर!!

   

• पावले त्याची कळेना, त्यास कोठे नेत होती?
  कोणती आकाशगंगा त्यास हाका देत होती?
  तो नव्हे, तो सूर्य गेला, सूर्यमालेतून जैसा......
  खुद्द ब्रह्माचीच त्याला साद ऐकू येत होती!

   

• कोण काय बोलतो? कोण काय झाकतो?
  तो वरून ऐकतो...तो वरून पाहतो!
  कोण वाहतो फुले, कोण वाहतो शिव्या?
  माणसास तो अरे, आरपार वाचतो!!

   

• मी भटांनी पेरलेल्या शायरीचे बीज आहे!
  मी पिढ्यांसाठीच केलेली अशी तजवीज आहे!
  अंतरी माझ्या भटांचे एक अग्नीहोत्र चालू......
  गझल माझी त्यामुळे साक्षात झाली वीज आहे!!

   

• लागला कोणास माझा ठाव आहे?
  दागिन्यांना केवढा या भाव आहे?
  काळजाला एक आहे चोरकप्पा.....
  मी जिथे एकेक जपला घाव आहे!

   

• आठवणींना स्थळकाळाचे कुठले बंधन?
  तरुण मनाला वार्धक्याचे कुठले बंधन?
  जे जे सुंदर असते त्यातच रमते मन हे......
  सुंदर शब्दांना झरण्याचे कुठले बंधन?

   

• प्रेमासाठी स्थळकाळाचे कुठले बंधन?
  रेशिमगाठीतल्या पिळाचे कुठले बंधन?
  काय करावे, करू नये ते भान कशाचे.....
  मुक्त मनांना व्यवहाराचे कुठले बंधन?

   

• आसन्नमरण माणसास हे ती काय देउनी गेली?
  संजीवन, सरणावर माझ्या, साक्षात शिंपुनी गेली!
  तहहयात प्रेमाच्या अग्नीमधे जळत जो बसलेला....
  निखा-यास निवणा-या माझ्या, का हवा देउनी गेली?

   

• वाट कोणी देत नसतो, वाट व्हावे लागते!
  गाठण्यासाठी किनारा लाट व्हावे लागते!
  चोरवाटा, आडवाटा लोपती वाटेमधे,
  गाठ शिखरांशी पडाया घाट व्हावे लागते!!

 

 

Powered by Froala Editor