1)
kitne hi atyachaar,kitne hi duraachaar,kitno ki daant-fatkaar…
kitni hi kureetiyan, kitni hi roodhiyan…
kitni hi paramparayein, kitni hi taqleefein…
kitne hi zakhm, kitne hi dard, kitne hi marz…
kissi se shoshit,
kissi ke kaaran poshit hokar bhi kuposhit….

Wo jiska bharan karti hai,
Wahi uska haran karta hai…

Wo jispe jaan lutaati hai,
Wahi uski jaan leta hai…

Wo khud jispe nichhavar ho jaati hai,
Wahi uske praan nichhavar kar deta hai…

Wo jiske liye jeeti hai,
Ghut-ghut ke khoon ka ghoont peeti hai,
Ik ‘uff!’ tak na karti hai,
Hans ke wo sab darindgi sahti hai…

Kya yeh shakti tum kabhi paa paaoge??

Kitna mushkil hai – Naari hona,
Tum kabhi na jaan paaoge…

2)
Garbh me aate hi,
Parikshan ki ‘Talwar’ uske gale latak jaati hai…
‘NAA’ hote hi wahi ‘Talwar’,
Uski saari aashayein,
Saari apekshayein,
Saare armaano ko,
Ek – ek nas,
Ek – ek nali,
Chhaant - chhaant kar, retkar, cheerkar, kaatkar,
Tukde – tukde kar jaati hai…

Saara pyaar, saare sapne, saari khushiyan
Khoon se saankar,
Badi berehmi, badi bedardi, badi hi darindgi se,
Ek ‘tumour’ ki tarah sharir se nikaal kar,
Phenk di jaati hain….

Kaise paida hone se pehle hi,
Kaise naari ban ne se pehle hi,
Kaise uske apne hi itne berehem ho jaate hain???
Kaise we apni kaleji ki nirmam hatya kar jaate hain???

Kya yeh darindgi kabhi seh paaoge??

Kitna mushkil hai – Naari hona,
Tum kabhi na jaan paaoge…

3)
koi ek ghar – baar,
kissi ek ka pyaar,
yadi wo aaye bhi ‘bahaar’,

fir bhi paati hai,
apno ki dutkaar,
“Nirasha” ki maar…

Fir bhi na naseeb mein,
Apno ka pyaar,
Ik Sneh-bhari puchkaar,
Paida hone ki khushi ya muskarahaton ki bauchhaar,
Na bant-ti mithai zordaar,
Na daai paati bakshees me haar,
Jaise uski bhi ho ik karaari ‘haar’…

Kyon nahi milta usey prem-may, mamta-may ‘sparsh’ ,
Kyon nahi dikhta usey apne hone pe ‘harsh’,
Kyon ho jaati hai wo baap k liye ek
‘sahukari karz’???

Kya tum ek navjaat ‘ haar’ kehla paaoge???

Kitna mushkil hai – naari hona,
Tum kabhi na jaan paaoge…

4)
Wo ‘haar’ hai, fir bhi wo ran-kshetra me dati hai,
Wo roz lad rahi hai,
Bhid rahi hai,
Seh rahi hai,
Aur reh bhi rahi hai…
Is tarah wahi ‘haar’ har roz ‘jeet’ bhi rahi hai…

Mat padho,
Seekho bas chulha chowka,
Karo bas ghar – grahsthi ke kaam,
Mujhe do, aur tujhe milega aadha ‘aam’;

Mard hun main,
Hun ghar ki shaan,
Saari shaan-o-shaukat hai mere naam;
Kamaaunga main, bahar jaunga main,
Main hi hun yahan ka shehzaada aur sultan…

Tu toh hai naari,
Chulhe-chowke main jhonki jaane wali,
Char-deewari ke bahar na teri darbari;

Tu hai ‘tamashbeen bandri’
Aur main hun tera madari….

Mere hi ishare pe nachegi tu,
Chahe rahe peehar ya ho sasural,
Tujhe karni hai meri khidmat,
Aur rakhna hai mera hi khayal;

Kyonki tu naari hai, Tu hai ‘haar’,
So nishchit hi hona hai tera haal
behaal, bad-haal…

Jhoothi shan-o-shaukat ke nashe me
Madhosh ‘mard’ ki yahi chhoti soch,
Samaaj ki sabse ghinauni aur bhayanak
Bimari hai, mahamari hai…

Kya tum ye bimari, mahamari sehen kar paaoge??
Kitna mushkil hai - Naari hona,
Tum shayad hi kabhi samajh paaoge…

5)
Par ab wahi ‘haar’ jeet mein tabdeel ho rahi hai,
Bimari, mahamari ke beech,
Ik aasha ki kiran jag rahi hai,
Shaan-e –madya mein madhosh ‘mard’ ke beech
Wo apni jagah bana rahi hai…
Wahi ‘hari’ wahi ‘tamashbeen bandri’
Ab ‘madam’ ki upaadhi paa rahi hai…

Sakaratmak hai ye, isey hone do,
Rokna hi hoga yeh bhedbhav,
Isi me nihit hai buddhijeevi samaj ka udbhav…

‘Naari s-shaktikaran’ zarurat hai is samaj ki,
Badalte parivesh aur badalte ‘kaale; itihaas ki…

Jab tum is badlaav ko apnaoge…

Kitna mushkil hai - Naari hona,
Tabhi yeh mehsus kar paaoge……………

Shivam Shukla

Powered by Froala Editor