गरजी-गरजी बरसै, करका बदरबा जे,
कोनी ठीहां मचिया बिछाबों गे दुलरिया।
झरिया में भींगी गेलौ, गेनरा-भोथरवा जे,
भींगी गेलौ अचरा के कोर गे दुलरिया।

 

भींगी-भींगी सुख्खी गेलौ छतिया के दूधबा जे,
सुख्खी गेलौ अखिया के लोर गे दुलरिया।
चाटी-चाटी लाल भेलै हाँथों के अंगुठबा से
लाले लाले सुगनी के ठोर गे दुलरिया

अरजै ले बाबू गेलौ, टकबा के ढेरिया जे
कहाँ में जे सुतलो, निंभोर गे दुलरिया।
जागी-जागी सुती गेलौ मनों के सपनमां गे,
सुती गेलौ जिनगी के भोर गे दुलरिया।

 

नियती के देहरी पे दोहरा करम देखी
विधना के नियमां कठोर गे दुलरिया।

 

सुधीर कुमार ‘प्रोग्रामर’

Powered by Froala Editor