कितणा बदली गेया , हुण अपणा ग्रां

हुण कुथु दिखणे, सैह् बाह्णें देईयां मंजीयाँ

सोफे बैड़ आई गे, दूरियां बणांई गे

उजड़ी गे खुह, टुटियां-सूक्कियां बाबड़ियां

छुटी गे घड़े, भुलियां घड़ोलियां

घर- घर नलकेया फ्रीजां लेई आए सब्ब

सैह जिदेहा न रेहा अपणा ग्रां

हुण कुथु दिखणीयां सैह, बैलां दियां जोड़ियाँ

गल्ले च तिन्नां दे झुलदे थे घंुघरू

लकड़ियाँ दिया हलां, सैह लोहे दे फाॅल

हुण इक्की ट्रैक्टरे घड़ियाँ च मुकाई देणा सारा फॅाह्

कितणा बदलोई गेया अपणा ग्रां

घरे घरे हुंदे थे, दुद्ध ,दही

छाह् पी करी कलेजे पौंदी थिआं ठंडाई

हरे -भरे खेत्र कन्नै बिच बगदियां थियां कुलांह्

फुल्दियाँ सरसों री गंदला खाणे दा औदां था कितणा स्वाद

कोठीयां बँगलेयां लेई गे सैह जगह

सोहणे गबरू, बाँकियां गौरीयां

परीयाँ ते ज्यादा सुन्दर थीयां ,ग्रां दियां छोरियाँ

पाॅउडर क्रीमा,ब्यूटी पालरां ते फैषनां

माणुया कमादे थे, भाऊवन्धियां न्भादें थे

झगड़ेयां मुकाणे तांई सयाणेयां ते सलाह लैंदे थे

इक दुए घर पैदल ओदें- जादें थे

बिछडेयां मलादें थे, कन्नै रूस्सेयां मणादे थे

फोनां मोबाईलां कन्नै इंटरनैटां उडाई दिता सैह् समा

कितणा बदली गेया हुण अपणा ग्रां

 

 

सुषमा देवी

 

 

Powered by Froala Editor