मिंजो अपणां म्हाचल लगदा छैल प्यारा

पूरीयाँ ऋतां दा माह्णु इथ्थु लैण नज़ारा

गर्मी,ठण्ड, सौआ, बरसात कन्नै सावण रा फुव्बारा

मने मोई लैंन्दियाँ सैलियाँ- सैलियाँ धाराँ

छैल लग्गण चीलाँ,दयाराँ दियाँ लमियाँ कताराँ

झुल्ली- झुल्ली दूह्रे होई आंदे,चीलाँ दयाराँ दे डालू

सर- सर झुल्लदियाँ ठण्डीयाँ ठण्डीयाँ हौआं

छण- छण लगण जाणि पायल री झणकारां

मिंजो अपणां म्हाचल लगदा छैल प्यारा...............................................

बधलाँ दे फाहू चिट्टे लग्गण न्यारे

बाँके लगदे छैल जिआं पिंजीओ कपाह

बर्फे कन्नैं ढकियाँ चोटियाँ,इंआ ,जणि अम्बरेओ छुँदियाँ

धुप्पा कन्नैं चमकण इआं ,जणि हीरे मोतियाँ दे दाणे

मतेयाँ देसा दे माह्णु लैंण इथ्थु आई नज़ारे

रज्ज़ी आंदा मन्न,अपणा दिखी ए नज़ारे

बाँका मिजों अपणा म्हाचल लगदा छैल प्यारा...........................................

छम्ब -छम्ब पौदें छर्हूडे ,छड़ छड़ बगदे डुग्घे डुग्घे नालू

डुग्घीयाँ खड्डा,उचडे कआलु,डगरेयाँ चारदे जिथ्थु गुआलु

रावी, सतलुज, ब्यास नदियाँ इथ्थु वगण ,अणमुक लौ पैदाकरण

ढाई दितां नैहरेयाँ दा निशां,चाय ,सेब दे बाग न्यारे

थांई थांई दिखणेयों अणमुक नजारे ,देवी देवते भी वसण

आई इथ्थु सारे ,कितणे भाग्य छैल म्हारे

भोले बाबा जी दा लाण जैकारा

तांईतां मिज्जो अपणा म्हाचल लगदा छैल प्यारा

पूरीयाँ ऋतां दा माहणु इथ्थु लैण नज़रा

 

 

 

सुषमा देवी

 

Powered by Froala Editor